აშშ-ის პრეზიდენტმა, ჯო ბაიდენმა განაცხადა, რომ რუსეთი არ უნდა იყოს აღიარებული ტერორიზმის სპონსორ სახელმწიფოდ.
თეთრ სახლში გამართულ ბრიფინგზე ჟურნალისტების კითხვაზე, უნდა აღიარონ თუ არა რუსეთი ტერორიზმის სპონსორ სახელმწიფოდ, ჯო ბაიდენმა უარყოფითი პასუხი გასცა.
29 მაისს, უკრაინის პრეზიდენტმა, ვოლოდიმირ ზელენსკიმ საერთაშორისო საზოგადოებას მოუწოდა, რუსეთი ტერორისტ სახელმწიფოდ აღიარონ.
„არაერთხელ შევახსენებ მსოფლიოს, რომ აუცილებელია საბოლოოდ აღიაროს რუსეთი, როგორც ტერორისტი სახელმწიფო, ტერორიზმის სპონსორი სახელმწიფო. ეს უბრალოდ სიმართლეა. ეს ასახავს იმ რეალობას, რომელიც ოკუპანტებმა უკრაინაში შექმნეს და რომლის გავრცელება ევროპაში სურთ. ეს იურიდიულად უნდა გაფორმდეს“, – განაცხადა უკრაინის სახელმწიფოს მეთაურმა.
