14 ივნისის დილა ახლო აღმოსავლეთში დაბომბვის ხმაურით დაიწყო: ირანმა ათობით ბალისტიკური რაკეტა და საბრძოლო დრონი გაუშვა ისრაელის მიმართულებით, ძირითადად ცენტრალურ და სამხრეთ რეგიონებში. დარტყმებმა დააზიანა ინფრასტრუქტურა თელ-ავივსა და ბეერ-შევაში, დაიღუპა სულ მცირე 3 ადამიანი, დაშავდა რამდენიმე ათეული.
ისრაელის ანტისაჰაერო სისტემამ მრავალჯერადი განგაშის ფონზე ათობით საფრთხე მოიგერია, თუმცა რამდენიმე რაკეტამ მიზანს მაინც მიაღწია.
თავის მხრივ, ისრაელის არმიამ გამთენიისას კვლავ განაახლა შეტევა ირანის სტრატეგიულ ობიექტებზე — სამიზნე გახდა რევოლუციური გვარდიის ბაზები დასავლეთ ირანში, ისფაჰანის ბირთვულ კომპლექსთან ახლოს. სამხედრო მეთაურების განცხადებით, „ოპერაცია გრძელდება, სანამ ირანის ბირთვული პროგრამა საფრთხეს წარმოადგენს“.
აშშ-ის პრეზიდენტმა დონალდ ტრამპმა, რომელიც ჯერ კიდევ ტრადიციული მედიის გვერდის ავლით, Truth Social-ზე აქტიურად საუბრობს, 14 ივნისის დილის პოსტში დაწერა:
„ყველაფერი ვიცოდით. ვიცოდით დრო, ვიცოდით მიზნები და ვიცოდით შედეგები. ჩვენი მოკავშირე ისრაელი მოქმედებდა გაბედულად და მიზანმიმართულად. ირანს ჰქონდა შანსი – ახლა იმკის საკუთარი გადაწყვეტილების შედეგს.“
ტრამპმა მოგვიანებით გამართულ პრესკონფერენციაზეც განმარტა, რომ აშშ-ის დაზვერვა იყო ჩართული წინასწარ დაგეგმვაში, თუმცა პირდაპირი მონაწილეობა უარყო. “ჩვენ არ დავბომბეთ, მაგრამ ყველაფერი ვიცოდით,” — აღნიშნა მან, ირანის მოქმედებებს კი “სადისტური რეჟიმის თვითგანადგურების პოლიტიკა” უწოდა.
გაერო-ს გენერალური მდივანი ანტონიო გუტერეში ორივე მხარეს მაქსიმალური თავშეკავებისკენ მოუწოდებს.
ევროკავშირი და რუსეთი: გამოთქვამენ შეშფოთებას და ამბობენ, რომ ბირთვული ობიექტების დაბომბვა „ძალიან სახიფათო პრეცედენტს“ ქმნის.
ბარელი ნავთობის ფასი ერთ დღეში 8 დოლარით გაიზარდა, რაც სიგნალია, რომ მსოფლიო ბაზრები უკვე რეაგირებენ გეოპოლიტიკურ შოკზე.
