რუსეთში სისხლის სამართლის საქმის წარმოება დაიწყეს იმ უცხოელი მოხალისეების მიმართ, რომლებიც უკრაინაში რუსეთის წინააღმდეგ იბრძვიან. საქმე ქართველ მოხალისეებსაც ეხება.
ამის შესახებ რუსეთის საგამოძიებო კომიტეტის ხელმძღვანელმა, ალექსანდრ ბასტრიკინმა განაცხადა.
ერთ-ერთ რუსულ გაზეთთან ინტერვიუში ბასტრიკინი, რუსული პროპაგანდის შესაბამისად ამბობს, რომ “არსებობს უკრაინის ტერიტორიაზე დაქირავებულთა მონაწილეობის ფაქტები დანაშაულებრივ ქმედებებში”.
“გამოძიება დიდი ბრიტანეთის, ამერიკის შეერთებული შტატების, კანადის, ნიდერლანდების და საქართველოს მოქალაქეების წინააღმდეგ მიმდინარეობს. კიდევ ხუთი სისხლის სამართლის საქმე აღიძრა უკრაინული ნაციონალისტური ჯგუფების წარმომადგენლების მიერ რუსი სამხედროების სიცოცხლეზე ხელყოფის ფაქტზე, ასევე ექვსი სისხლის სამართლის საქმე რუსი სამხედროების ბულინგის ფაქტებზე”. – განაცხადა რუსმა მაღალჩინოსანმა.
ალექსანდრ ბასტრიკინის თანახმად, რუსეთი უკრაინას ადანაშაულებს ” მასობრივი განადგურების იარაღის შემუშავებაში” და გამოძიებას ამ კუთხითაც აწარმოებს.
