“პუტინის კიდევ ერთი გამარჯვების თავიდან ასაცილებლად, დასავლეთმა სააკაშვილი ახლავე უნდა გადაარჩინოს”- ამ სათაურით Forbes მიხეილ სააკაშვილზე სტატიას აქვეყნებს, რომელშიც საუბარია მის როლზე საქართველოს განვითარებაში, ბიძინა ივანიშვილზე, პუტინსა და მესამე პრეზიდენტის გათავისუფლების აუცილებლობაზე.
“პოსტსაბჭოთა ეპოქაში თავისუფალი სამყაროს ერთ-ერთი უდიდესი მოკავშირე, თავის ქვეყანაში, როგორც პოლიტპატიმარი ისე კვდება, განზრახ მოწამლული.
საქართველოს ყოფილი პრეზიდენტი მიხეილ სააკაშვილი იყო აშშ-ისა და ევროპის ნამდვილი მეგობარი, რომელსაც ქვეყანა მყარად მიჰყავდა დასავლეთისკენ, განსაკუთრებით კი ხმამაღლა უჭერდა მხარს დემოკრატიას და თავისუფალ ბაზარს, რის გამოც მისი პრეზიდენტობის პერიოდში, საქართველო რამდენჯერმე დასახელდა ბიზნესის წარმოებისთვის საუკეთესო ქვეყნად. ის იყო მისაბაძი მაგალითი 2000-იანი წლების პროდემოკრატიული რევოლუციებისთვის. მან არაერთხელ უწოდა პუტინის დროს მოსკოვს პოსტსაბჭოთა დამოუკიდებლობის, იდეალიზმისა და განათლებული მსოფლიო წესრიგის მთავარი მტერი. ამ ყველაფერმა ის გახადა კრემლის რისხვის მთავარი სამიზნე, რამაც გამოიწვია 2008 წელს რუსეთის შეჭრა საქართველოში.
ჩვენ წინაშე დგას გადაუდებელი ამოცანა, უზრუნველვყოთ მისი გათავისუფლება და საზღვარგარეთ სამკურნალოდ გადაყვანა, სანამ ძალიან გვიან არ არის. ყოველ შემთხვევაში, წმინდა ჰუმანიტარული მიზეზების გამო. მაგრამ ამის გარდა, სააკაშვილი, როგორც პიროვნება განასახიერებს იმას, რის სიმბოლოდაც იქცა უკრაინა: პუტინის სადიზმისა და რუსეთის იმპერიალიზმისთვის წინააღმდეგობის გაწევისა, პოსტსაბჭოთა ქვეყნების დამოუკიდებლობისა და უსაფრთხოების გამტკიცებისა, ასევე თავისუფალი ერების საზოგადოებისთვის შეერთების სურვილის სიმბოლოდ.”– წერია სტატიაში.
სტატიაში ბიძინა ივანიშვილის შესახებ წერია, რომ 2012 წლის ოქტომბერში გამართულ არჩევნებში გამარჯვება” და, რომ “ბიძინა ივანიშვილმა დადო ფაუსტისეული შეთანხმება, რომ ქვეყანა პოლიტიკურად დადუმებული ყოფილიყო, არ გამოეღწია ღია დემოკრატიის აჟიოტაჟს.”
“სააკაშვილის მმართველობის პერიოდში [2004-2013], რის შემდეგაც მან დატოვა საქართველო, მოსკოვს ქვეყანაში არ შეუწყვეტია დესტაბილიზაციის ქმედებები. ერთ-ერთი 2012 წლის ოქტომბრის ეროვნულ არჩევნებში КГБ-ს ჩარევაც იყო. არჩევნები სააკაშვილმა რუსეთის მიერ დაფინანსებულ ოლიგარქ, ბიძინა ივანიშვილთან წააგო. საქართველო არასოდეს გამოჯანმრთელებულა, შეუსრულებელი დარჩა დაპირება, რომ სრულად შეუერთდებოდა თავისუფალი სამყაროს ერებს. ქვეყანა ნელ-ნელა ჩავარდა სტაბილურობის ძილში პოლიტიკური ინერციის სანაცვლოდ, რომელიც მოსკოვმა გამოიწვია.
მათთვის, ვინც ამტკიცებდა, რომ სააკაშვილი ხელისუფლებაში ყოფნისას მარტივად წყვეტდა კანონთან დაკავშირებულ საკითხებს და დემოკრატიული პროცესები თავის სასარგებლოდ წარმართა, განსაკუთრებით მის დასავლელ კრიტიკოსებს, პასუხი აღარ სჭირდებოდათ: წააგო, წავიდა, მაშინ როცა მისი კონკურენტი კვლავ აკონტროლებს ქვეყანას პოლიტიკური მარიონეტებისა და რუსეთიდან უსაზღვრო დაფინანსების მეშვეობით.
სააკაშვილმა გაგვაფრთხილა, რომ პუტინი უკრაინასთან დაკავშირებით იმავეს მოიმოქმედებდა, თუ დასავლეთი მკაცრ პასუხს არ გასცემდა საქართველოს არასათანადო მოპყრობაზე. ჩვენ არ გავაკეთეთ ეს. სინამდვილეში, დასავლური ელიტა მას განიხილავდა, როგორც არაგონივრულ პროვოკატორს, რომელიც საფრთხეს უქმნიდა მოსკოვთან ბიზნესის კეთების ინტერესებს, დაწყებული დიდი ნავთობიდან მსხვილ საინვესტიციო ბანკებამდე. თუმცა, ახლა აშკარად ვხედავთ, ის მართალი იყო. მას იმდენად პატივს სცემდნენ საქართველოში მიღწევებისთვის, გამჭვირვალობისთვის, სასამართლო სისტემის გასუფთავებისთვის, ეკონომიკის ტრანსფორმაციისთვის, დამოუკიდებელი მედიის შექმნისთვის და მრავალი სხვა – ეს ყველაფერი მისმა მემკვიდრეებმა წაშალეს – რომ მან და მისი გუნდის სხვადასხვა ოფიციალურმა პირებმა მოგვიანებით მიიღეს თანამდებობები უკრაინაში და ა.შ.
ის გახდა უკრაინის მოქალაქე, ქვეყნის, რომელიც უყვარდა, სადაც კოლეჯში სწავლობდა. 2020 წელს ის დაინიშნა პრეზიდენტ ზელენსკის მრჩევლად.
მთელი თავისი გადასახლების განმავლობაში იგი გამოჩენილ საზოგადო მოღვაწედ დარჩა. გასაკვირი არ არის, რომ მისმა პოლიტიკურმა კონკურენტებმა საქართველოში ის დაუსწრებლად გაასამართლეს გაყალბებული ბრალდებებით მაშინდელ პოლიტიკურად მართვად სასამართლოში. მას ბრალი ორ ცალკეულ საქმეში თანამონაწილეობაში ედებოდა, მკვლელობაში და ფიზიკურ შეურაცხყოფაში. ის ინციდენტებიდან წლების შემდეგ, მხოლოდ მაშინ გაასამართლეს, როცა საზღვარგარეთ წავიდა და სასამართლო პროცედურები გაყალბდა. არცერთ დამოუკიდებელ დამკვირვებელს არ შეუძლია ეჭვი შეიტანოს სასამართლო წესების პოლიტიკურ უზურპაციაში და მიზეზებში – კერძოდ, რომ არ დაბრუნდეს სააკაშვილი თბილისში, როგორც ეფექტური მოწინააღმდეგე. იმის გამო, რომ ნაცრისფერმა კარდინალმა, რომელიც საქართველოს ჩრდილიდან მართავს, ბიძინა ივანიშვილმა დადო ფაუსტისეული შეთანხმება, რომ ქვეყანა პოლიტიკურად დადუმებული ყოფილიყო და არ გამოეღწია ღია დემოკრატიის აჟიოტაჟს, რათა ის დამსგავსებოდა რუსეთის ინტერესებში მყოფ ქვეყნებს და არც კავკასიაზე მოსკოვის კონტროლის გეოსტრატეგიული დამრღვევი ყოფილიყო.”
სტატიაში მოცემულია თუ რატომ არის აუცილებელი “თბილისის ხელისუფლებაზე დაუყოვნებლივი ზეწოლა და სააკაშვილი გადარჩენის კამპანიის გააქტიურება.”
“ხუთი დამოუკიდებელი ამერიკელი ექიმების ჯგუფმა დაადგინა, რომ მას აწუხებს მთელი რიგი სერიოზული დაავადებები, რომლებიც საჭიროებს მოწინავე სამედიცინო მკურნალობას შეერთებულ შტატებში ან დასავლეთ ევროპაში თანამედროვე დაწესებულებაში. ერთი წლის წინ დაკავებამდე სააკაშვილი ენერგიული ჯანმრთელი მამაკაცი იყო; მას ახლა აწუხებს დასუსტებული ფსიქოლოგიური, ნევროლოგიური, ორთოპედიული და კუჭ-ნაწლავის დაავადებები, რომლებიც საფრთხეს უქმნიან მის სიცოცხლეს. მან დაიკლო 40 კილოგრამზე მეტი, განიცადა კრუნჩხვები, აღენიშნებოდა სერიოზული ნეიროკოგნიტიური დარღვევა და უიმედოდ საჭიროებს სასწრაფო ორთოპედიულ ოპერაციას ციხის მცველების მიერ ცემის შედეგად.
ის მკურნალობს ათზე მეტი წამლით, რომელთაგან ზოგიერთი აუარესებს მის მდგომარეობას და ზოგიერთი მათგანი ჯანმრთელობის გლობალური სტანდარტებით უსაფრთხოდ არ ითვლება. არსებობს მტკიცებულება, რომ ის მოწამლული იყო და დაუნიშნეს არასწორი წამლები, რამაც გამოიწვია მის ტვინში თეთრი ნივთიერების შემცირება. არსებობს კონსენსუსი ამერიკელ ექიმებსა და თითქმის ათეულ ევროპელ ექიმთა შორის- სააკაშვილს ესაჭიროება სასწრაფო სამედიცინო დახმარება მისი სიცოცხლის გადასარჩენად საზღვარგარეთის მოწინავე სამკურნალო დაწესებულებაში.
როგორც ევროპის საბჭოს წარმომადგენლებმა აღნიშნეს ბ-ნ. სააკაშვილის სიკვდილს მძიმე შედეგები მოჰყვება საქართველოში სამოქალაქო საზოგადოების სტაბილურობის მხრივ და პოტენციურად დამანგრეველ გავლენას მოახდენს ქვეყნის მომავალზე. შეერთებული შტატების ოფიციალურ პირებს უნდა მოვუწოდოთ მაქსიმალური ზეწოლა მოახდინონ საქართველოს მთავრობაზე იმისათვის, რომ ჰუმანიტარული ნიშნით გაათავისუფლონ სააკაშვილი, რათა თავიდან იქნას აცილებული დემოკრატიული იდეალების შუქის ჩაქრობა, რომელიც მტკიცედ დგას პუტინის იმპერიალიზმის წინაშე.”– წერია სტატიაში.
