საქართველოს პრეზიდენტი სალომე ზურაბიშვილი რუსეთის პრეზიდენტის, ვლადიმირ პუტინის გადაწყვეტილებას პირდაპირი ფრენების აღდგენისა და უვიზო მიმოსვლის დაწესებას მორიგ პროვოკაციად აფასებს. ის ტვიტერზე რუსეთის პრეზიდენტის გადაწყვეტილებას გამოეხმაურა.
“მორიგი რუსული პროვოკაცია! საქართველოსთან პირდაპირი ფრენების აღდგენა და სავიზო რეჟიმის გაუქმება მიუღებელია, სანამ რუსეთი განაგრძობს აგრესიას უკრაინაზე და ოკუპირებული აქვს ჩვენი ტერიტორია!” – განაცხადა ზურაბიშვილმა ტვიტერზე.
დღეს, 10 მაისს, რუსეთის პრეზიდენტმა ვლადიმირ პუტინმა ორი ბრძანებულება გამოსცა. გაუქმდება საქართველოსთან პირდაპირი ფრენების აკრძალვის გადაწყვეტილება და ასევე, საქართველოს მოქალაქეებს 15 მაისიდან რუსეთში უვიზოდ, 90 დღემდე ვადით ჩასვლის შესაძლებლობაც ექნებათ.
