მთავრობის ადმინისტრაციასთან “ნაციონალური მოძრაობის” წევრები და მათი მხარდამჭერები ყოფილი პრეზიდენტის მიხეილ სააკაშვილის სამკურნალოდ საზღვარგარეთ გადაყვანის მოთხოვნით აქციას მართავენ.
აქციის ერთ-ერთი ორგანიზატორის ალიკა კუპრავას თქმით, აქციები გაგრძელდება, ვიდრე მიხეილ სააკაშვილი არ გათავისუფლდება.
“არესტოვიჩისა და ფეიგინის დაანონსებულია დღევანდელი აქცია. აქცია თბილისისა და ბათუმის გარდა, მსოფლიოს 17 ქვეყანაში ტარდება. აქციის მიზანი და მთავარი მოთხოვნა არის მიხეილ სააკაშვილის გათავისუფლება და ჰუმანიტარული მიზნით, საზღვარგარეთ კლინიკაში გადაყვანა, სადაც უზრუნველყოფილი იქნება მისი ჯანმრთელობა და სიცოცხლე. “ვივამედი” ვერ უზრუნველყოფს მის ჯანმრთელობას და დღეს გახდა ცნობილი, რომ მისი წონის კლება შეუქცევადად მიმდინარეობს. აქციები გაგრძელდება, ვიდრე მიზანი არ იქნება მიღწეული. შეუძლებელია იმ სამარცხვინო შეცდომას ვიმეორებდეთ, რაც 90-იან წლებში დავუშვით და მოვკალით დამოუკიდებლობის მომპოვებელი პრეზიდენტი. პრეზიდენტ სააკაშვილის სიცოცხლეს აქვს განსაკუთრებული წონა და ფასი, რადგან ის ქვეყნის პირველი პირი იყო და ოდესღაც ის ქართველი ხალხის რჩეული იყო და ასევე, მიხეილ სააკაშვილის გათავისუფლება არის წინაპირობა ჩვენს ევროპულ გზაზე. თუ მიხეილ სააკაშვილს არ გაათავისუფლებს საქართველოს ხელისუფლება, ან თუ ჩვენ არ ვაიძულებთ ბიძინა ივანიშვილის ხელისუფლებას, რომ გადაიყვანოს უცხოურ კლინიკაში, მაშინ ჩვენთვის ევროპული კარი დაიხურება და მოვწყდებით ისტორიულ არჩევანს”, – განაცხადა ალიკა კუპრავამ.
აქციის მონაწილეებს ადგილზე მიტანილი აქვთ ბანერები და დროშები წარწერით “თავისუფლება მიშას”.
ასევე, ადგილზე მობილიზებულია დიდი რაოდენობით პოლიცია. პოლიციამ კანცელარიის ტერიტორია ჯებირებით შემოსაზღვრა.
ფოტო: ipn.ge
