პოლიტიკა

ძლიერი ქარის გამო სამეგრელოში, იმერეთსა და გურიაში მოსახლეობის ნაწილს დენი არ მიეწოდება

დასავლეთ საქართველოში ძლიერმა ქარმა ელექტროგადამცემი ინფრასტრუქტურა დააზიანა, რის გამოც სამეგრელოში, იმერეთსა და გურიაში მოსახლეობის ნაწილს ელექტროენერგიის მიწოდების პრობლემა შეექმნა. კომპანია “ენერგო-პრო ჯორჯიაში” ამბობენ, რომ ტექნიკური სამსახური საგანგებო რეჟიმში მუშაობს.

“გუშინ გვიან საღამოს ენერგო-პრო ჯორჯიამ შეძლო აბონენტების ნაწილისთვის ელექტროენერგიის მიწოდების აღდგენა, თუმცა დღეს დილით კვლავ გაუარესდა ამინდი და სამეგრელოს, იმერეთის და გურიის აბონენტების ნაწილს ელექტროენერგია კვლავ შეზღუდვით მიეწოდება. სტიქია სარეაბილიტაციო სამუშაოებს ხელს უშლის”, – აცხადებენ კომპანიაში.

ძლიერმა ქარმა იმერეთის მუნიციპალიტეტები მნიშვნელოვნად დააზარალა. დაზიანებულია როგორც კერძო ინფრასტრუქტურა, ასევე სახელმწიფო შენობები, რეგიონის 150 სოფელს არ აქვს დენი. წყალი არ მიეწოდება ქუთაისის მუნიციპალიტეტის 3 ათას აბონენტს. ძლიერი ქარის გამო 600 შენობა ნაწილობრივ ან სრულად სახურავის გარეშეა დარჩენილი, აქედან 340 მდე კერძო სახლია, 180 – მრავალბინიანი კორპუსი, 40 სახელმწიფო და 20 – ბიზნესობიექტი.

პრობლემებია სამეგრელოს მუნიციპალიტეტებშიც – დაზიანდა 966 კერძო საცხოვრებელი სახლის და 38 საცხოვრებელი კორპუსის, 2 ამბულატორიის, 5 საბავშვო ბაღის, 5 საჯარო სკოლის, 3 საჯარო სკოლის დარბაზის, 10 ადმინისტრაციული შენობის სახურავები. ელექტროენერგია არ მიეწოდება 114 ადმინისტრაციულ ერთეულს.

ასევე ნახეთ

Human Rights Watch – საქართველოში მედიის თავისუფლების მხრივ მდგომარეობა გაუარესდა, რაც მედიის წარმომადგენლებზე გახშირებული თავდასხმებით და კრიტიკული ტელეარხის დირექტორის დაპატიმრებით გამოიხატა

მედიის თავისუფლების მხრივ მდგომარეობა გაუარესდა, რაც მედიის წარმომადგენლებზე გახშირებული თავდასხმებით და კრიტიკული ტელეარხის დირექტორის დაპატიმრებით გამოიხატა, …