სტიქიამ კახეთის ორი მუნიციპალიტეტი, ყვარელი და ლაგოდეხი დააზარალა. მოსახლეობა მიყენებულ ზარალს ითვლის.
ყვარელში ქინძმარულის ზონაში დაისეტყვა ჰექტრობით ვენახი. მევენახეების ინფორმაციით, მოსავლის 80% განადგურდა. დასეტყვილია ასევე ერთწლიანი კულტურები, მათ შორის საზამთროს და ნესვის ბაღები.
ლაგოდეხში კი რამდენიმე სოფელში ქარმა საცხოვრებელ სახლებს სახურავები გადახადა. დაზიანდა 60-ზე მეტი საცხოვრებელი სახლის სახურავი. მოგლეჯილია ელექტროგადამცემი ბოძები.
სტიქიის ზონაში ადგილზე იმყოფებიან ადგილობრივი ხელისუფლების წარმომადგენლები. მათი თქმით, სპეციალურმა კომისიამ მუშაობა დღეს დილიდან უკვე დაიწყო და მოხდება ზარალის დათვლა.
