უკრაინული მედიის ინფორმაციით ამერიკის შეერთებული შტატები რუსეთის ფედერაციის დაყადაღებული აქტივების საშუალებით უკრაინაში განადგურებული ინფრასტრუქტურის აღდგენას გეგმავს, ამის შესახებ აშშ-ის სახელმწიფო მდივნის მოადგილემ პოლიტიკურ საკითხებში, ვიქტორია ნულანდმა აშშ-უკრაინის პარტნიორობის ფორუმზე სიტყვით გამოსვლისას განაცხადა. მისი განცხადებით აშშ-ის იუსტიციის სამინისტრომ, კონგრესის მხარდაჭერით, მიიღო უფლებამოსილება, რუსი ოლიგარქებისგან ჩამორთმეული უკანონო აქტივები უკრაინის აღდგენისთვის გამოიყენოს.
„სხვა საკითხებთან ერთად, ვმუშაობთ იმაზე, რომ რუსეთმა გადაიხადოს იმისთვის, რაც გაანადგურა“, – თქვა მან.
„თებერვალში ჩვენ გამოვაცხადეთ პირველი ტრანში 5.4 მილიონი აშშ დოლარის ოდენობით ამ უფლებამოსილების ფარგლებში და მოგვიანებით იქნება მეტი განცხადებები“, – აღნიშნა ნულანდმა.
