ქართველმა ტყვიის მსრილელებმა 3 მედალი მოიპოვეს სლოვენიის ქალაქ რუსეში მიმდინარე გრან პრის პირველ საშეჯიბრო დღეს.
პნევმატური იარაღიდან 10-მეტრიან დისტანციაზე სროლაში პირველ დღეს ახალგაზრდებმა იასპარეზეს – გოგონებმაც და ბიჭებმაც, ჩვენმა ნაკრებმა კი გამოსვლა 3 მედლით დაასრულა – 2 ვერცხლი და 1 – ბრინჯაო.
თავდაპირველად ჩვენებმა წარმატება გოგონათა ტურნირში მოიპოვეს, სადაც თითო ვერცხლ-ბრინჯაო დაისაკუთრეს. ეს თელაველმა ტყუპებმა შეძლეს – მარიამ ფროდიაშვილი ვიცე-ჩემპიონი გახდა, სალომე ფროდიაშვილი მესამეზე გავიდა.
მარიამ ფროდიაშვილმა საკვალიფიკაციო ეტაპიც საკმაოდ კარგად ჩაატარა – 571 ქულით გაიმარჯვა. სალომე 568 ქულით მესამე აღმოჩნდა.
ფინალში ჩვენგან საუკეთესოდ კვლავაც მარიამ ფროდიაშვილმა ისროლა, ვინც ბოლომდე შემორჩა ფინალ-ჰოლს, თუმცა სომეხმა მსროლელმა მაინც აჯობა: გაბრიელიანმა 239.7 ქულით დაასრულა გამოსვლა, ქართველმა – 233.4-ით და ვერცხლს დასჯერდა. სალომე ფროდიაშვილმა 210.7-ით დაამთავრა გამოსვლა და ბრინჯაოსაც დაეუფლა. აბრამიშვილის ფინალური მონაგარი 167.8 ქულა გამოდგა, რაც მეხუთე მაჩვენებელი აღმოჩნდა.
ბიჭებმა 1 ვერცხლი მოიპოვეს, რაც ქუთაისელმა გიორგი მუმლაძემ შეძლო. აქ 3 მონაწილე გვყავდა და 3-ვე გავიდა ფინალში. შესარჩევი ეტაპი ყველაზე კარგად მუმლაძემ ჩაატარა – 565 ქულა და მე-3 ადგილი. მეორე ქუთაისელმა იოანე ხვარეშიამ 560 ქულა დააგროვა, თუმცა მხოლოდ ერთი საფეხურით ჩამორჩა მუმლაძეს – IV ადგილი. ჩვენი გუნდის კიდევ ერთი დებიუტანტი, თბილისელი ლაშა შავშიშვილი 545 ქულით VIII ადგილზე გავიდა და ფინალის ბოლო საგზურიც დაისაკუთრა.
ფინალშიც ჩვენგან საუკეთესოდ ისევ მუმლაძე გაისარჯა და ვერცხლს დაეუფლა 235.6 ქულით.
